يوميات زوجين معاصرين (بكل كدب سعداء جدا)

الزوجه :هو انت ليه ما بتقوليش كلام ؟!!

الزوج :نعم

الزوجه :ليه ما بتقوليش كلام زي ما كل الرجالة بتقول لستاتهم ؟! هو انا مش ست ولا ايه

الزوج :انتي اتهبلتي ؟!

الزوجه :انت بتشتمني ليه ؟

الزوج :انا شتمتك؟! بلاش وجع دماغ ..انا مش مراهق فاضي ماواريش حاجة عشان اقعد اشغلك اسطوانات خايبة ..انتي ايه اللي حصلك مانتي كنتي عاقلة طول عمرك

الزوجه :طيب مانا لسه عاقلة ..بس انا متضايقة ..مخنوقة ..

الزوج :اه بصراحة معاكي حق انتي تخنتي بصراحة ولازم تعملي دايت

الزوجه :دايت ايه .هو انا كل ما اقولك اي حاجة تقولي تخنتي .انت محسسني ان وزني مليون كيلو مثلا

الزوج :لا مانا مش هستنى لما تبقى مليون كيلو..انتي جسمك ماكانش كدا قبل الجواز ..تخنتي ..جدا وانا سايبك واقول هتحس من نفسها ومافيش فايدة

الزوجه :ماهو طبيعي تخنت مش مخلفة 3 عيال ..

الزوج :لا وانتي الصادقة مش من ال 3عيال دا من كتر اللغ طول النهار والرمرمة والقعدة من غير لا شغلة ولا مشغلة

الزوجه :يا نهار اسود ..هو مراعاة بيت و3 عيال مش شغلة
اه وانت هتحس ليه ..مانت طول النهار في شغلك وبتيجي تلاقي كل حاجة زي الفل والعيال مذاكرين ومستحميين و نايمين والبيت مترتب والاكل جاهز على اساس ان الحاجات دي بتتعمل لوحدها مش الجارية اللي اشتريتها من 10 سنين هي اللي بتور زي النحلة طول النهار
اصل العيال دي بتتربى لوحدها كدا مش انا اللي بربي

الزوج :تربية ايه دانتي طول النهار بتصرخي في العيال زي المجنونة ..لو عايزاني اخدك لدكتور نفساني انا ماعنديش مانع

الزوجه :هي وصلت لكدا ..دكتور نفساني
حرام عليك اللي انت بتعمله فيا ..يا اخي حس بيا شوية بقى
انا اخر بند في اهاتك ..شغلك ..ولادك ..اهلك ..صحابك ..بلاي ستيشن ..ماتشات كورة ...كوتشينة ...انا اخر حاجة في حياتك
انا بتصعب عليا نفسي لما الاقي واحد بيحب واحدة ..بقول هو انا ناقصني ايه عشان اتحب زي دي
انت ما بتحبنيش ..ولا عمرك حبيتني ..

الزوج :اه صح عشان كدا اتجوزتك وبقالي 10 سنين معاكي ...انتي اتجننتي بجد ..اعقلي وبلاش تسمعي كلام صاحباتك اللي عايزين يخربوا بيتك

الزوجه :صاحبتي عايزين يخربوا بيتي على اساس ايه ..ناقصهم ايه مثلا

الزوج :ناقصهم راجل زيي..انتي عندك شك ان اي واحدة من صاحبتك ما بتحسدكيش عليا

الزوجه :يابني انت اللي مجنون على فكرة مش انا ..انت فعلا عندك جنون العظمة ..مافيش حد بيحسد حد على حاجة
انت مش فارق عن اي راجل تاني ..احسن في حاجات ..اوحش في حاجات ..والمحصلة واحدة

الزوج :دا على اساس اني متجوز الست السوبر اللي مافيش منها تاني
انتي زمان كنتي ة ..مهتمة بنفسك ..جسمك كويس..مثقفة .هادية...كنتي شخصية جذابة فعلا ..انثى بكل المقاييس
بصي دلوقتي عاملة ازاي .. حتى احساسك اتغير ..صوتك الحنيين اتغير ..
تخنتي ..فقدتي جزء كبير من انوثتك بسبب صريخك في العيال طول النهار وخناق مع الست اللي بتنضف ..ومشاكل مع البواب..ما بتتصليش بيا وانا في الشغل غير عشان تقوليلي الغسالة باظت ..التكيف اتحرق ..الولد عامل مشكلة في المدرسة
اييييييييييييييه ..هي دي بقت العلاقة بيني وبينك ؟! وبعد كدا بتشتكي اني مابقولكيش كلام ؟؟!! ومتضايقة اني بقولك اتجننتي ؟؟!

الزوجه :لا اسم الله ..انا متجوزة الان دولون ولا عمر الشريف وانا مش واخدة بالي تصدق
بالنسبة لكرشك ؟؟!! ايه ؟؟!! دانت بقيت شبه موظفين الحكومة اللي كانوا بيطلعوهم في الافلام زمان وناقص تدخل عليا بالبطيخة
عندك حالة خرس ..بتدخل من الشغل مكشر ع الحمام على قناة الجزيرة ..دانت حتى بتتعشى قدام التيليفيزيون
لحد ما تنام ع الكنبة بردو قدام التيليفيزيون ..ايه ..مش في بني ادمه عايشة في البيت معاك تكلمها





مش مهم بقيت التفاصيل ..انا حاولت اجمع شوية مشاكل بسمع عنها بين اي اتنين شباب متجوزين ما بقالهمش كتير
ممكن يكون في مبالغة شوية لأنه بردو الى حد كبير الكلام من خيالي وشوية اضافات لزوم الحبكة الدرامية

المهم ان انا واكيد كلنا مالناش نفس ابدا اننا نكون شبه النماذج العجيبة دي لما نتجوز
وكلنا عندنا يقين اننا مش هنبقى كدا
مع ان حتى اللي بقوا كدا بردو كان عندهم نفس اليقين انهم هيبقوا مختلفين
اكيد كل بيت فيه مشاكل زوجية مافيش ناس عايشيين من غير مشاكل
في حاجات صغيرة بتعدي ..وفي حاجات بتكبر وبتسبب الطلاق
ايه في نظركم اللي بيخلي الحياة بعد الجواز تختلف كتير اوي كدا عن قبل الجواز
هل المسؤوليات بتسبب ضغط الزوجين ما بيحاولوش يتخلصوا منه اول بأول فبيحصل تراكمات بتؤدي للانفجار؟

اولا مرسى قوى ياايس على الموضوع الجميل ده

ثانيا فيه حاجات كتير قوى بتعمل مشاكل بين الزوجين غير المسؤليات

اكتر حاجه ممكن تعمل مشاكل وتكبر المشاكل كمان

قله التواصل بين الزوجين

لازم يبقى فيه بينه طريقه يتكلموا بيها مع بعض

يا بيها مشاكلهم بهدوء

وانشاءالله ربنا ميجبش اى حاجه وحشه

ميرسى طبعا يا سمايلى ع الكلام الجميل ده
و ع المشاركه