اقلعلك عين وتقلعيلي عين.. ونعيش عور احنا الاتنين هههههههه

أنا
اتفرجت على فيلم عنترة ابن شداد يجي خمسين مرة, ودا يرجع لعشق والدي لهذا
الفيلم. من صغري وانا بتفرج ع الفيلم باشوف عنترة, اللي عرفت بعد كدة انه
ممثل واسمه فريد شوقي بس كان داهن جسمه اسود. وكنت معجبة جدا بشجاعته وحبه
لعبلة. بس اللي كان مجنني ف الفيلم هو شيبوب. شيبوب كان أخو عنتر ف الفيلم
وكان بيحب يعزف ع الربابة ويغني.. لغاية هنا مافيش مشكلة. لكن اللي كان
محيرني أوي ان شيبوب رغم انه واد رومانسي وحبيب زي عنتر, إلا انه لما كان
يحب يغازل واحدة يخش عليها بجملة غزل غريبة جدا. كانت لما واحدة تعجبه
يروح داخل عليها برقة وخفة دم كدة و يقولها بكل ثقة: "تيجي اقلعلك عين و
انتي تقلعيلي عين ونعيش عور احنا الاتنين؟"! غريبة دي.. مش كدة؟

طبعا
البنت كانت تسمع الكلمتين دول وتبصله كدة كأنها بتقوله "يا سم" وتطنشه.
طبيعي يعني, امال هو فاكر ايه؟ فيه واحد يغازل واحدة كدة؟ بس ليه شيبوب
الرومانسي اللي بيحب المغنى وبيألف اغاني جميلة وفيها حرفية عالية, يقول
كلام زي الدبش كدة؟ يعني شوف مثلا لما حب يبشر عبلة (اللي استعبدوها عشان
مارضيتش تتجوز الامير) ان عنتر حبيبها جاي وجايب معاه الجمال الحمر, قال
ايه؟ "ألا يا حامل الجرة.. جميع اخبارنا سارة.. وجايبين الجمال حمرة..
لاحبابنا واهالينا". معقولة شيبوب الفنان ده, يقول اقلعلك عين وانتي
تقلعيلي عين؟ .. هو الصراحة كان دمه خفيف ما انكرش, بس لو حد قالي كدة
اكيد يعني هاقوله انت اهبل ولا شكلك كدة؟

المهم
تروح السنين وتيجي السنين, واذ فجأتن ألاقيلك عمك شيبوب بتاع اقلعلك عين
ونعيش عور احنا الاتنين دا موجود فعلا ف الدنيا. قابلته وجها لوجه, ومش
مرة واحدة.. لأ.. كذا مرة. انا الاول ما كنتش فاهمة. كنت الاقي واحد كدة
بيجر شكلي من غير داعي وبيستفزني من غير سبب. يا عم هو حد داسلك على ديل؟
انت بتعمل كدة ليه؟.. وبعدين ولاد الحلال رسوني ع الدور.. قالولي دا فلان
دا شكله معجب بيكي وعايز يلفت نظرك! رحت أنا قولت "آه.. على طريقة شيبوب
يعني".. طبعا ما حدش فهم أنا قصدي ايه. بس أنا ساعتها عرفت ان السلوك اللي
يبان غير مبرر لازم يكون وراه سبب

زي
بالظبط الناس اللي بتيجي تجر شكل البنات ف المدونات الحريمي.. تلاقي واحد
هوايته التعليق على مدونات البنات. والبنت من دول يا عيني تلاقي واحد لا
تعرفه ولا يعرفها وعمال يتبلى عليها ويقولها كلام هي ما قالتوش, أو يفسر
كلامها تفسير غريب كدة عن طريق رأس الرجاء الصالح عشان يطلعها غلطانة
وخلاص. أو تلاقي واحد مثلا عايز يسأل سؤال بس الجلالة واخداه, فيروح مخبط
ويقوللها "تلاقيكي مش عارفة كذا". المفروض طبعا بعقلية شيبوب انها هتنهار
بقى ويحصلها عملية استنفار وتستموت في انها تثبت انها عارفة الشيء
الفلاني. دا على اساس ان أي واحدة هي عبارة عن عيلة بضفاير بتلعب الأولى ف
الشارع

المهم الموضوع دا
ابتدا معايا أنا شخصيا من أول ما ابتديت ادون خالص واكتشفت أنه متكرر على
معظم مدونات البنات. زي مثلا انك تكتبي تعليق عادي خالص عند حد, فتلاقي
واحد داخل يعلق على تعليقك انتي ويطلع فيه القطط الفاطسة عشان يجر شكلك.
وبعدين تلاقيه داخل عندك على مدونتك وسايبلك تعليق غريب كدة, تقريبا على
كلام تاني انتي ماكتبتيهوش. أنا لما حصلت الحكاية دي معايا ما حطتش ف بالي
ف الأول, بس لما الموضوع اتكرر, قولت لأ بأة. هي موضة ولا إيه؟ لما أروح
أشوف كدة هما بيردوا على المدونات الرجالي ازاي. وخير اللهم اجعله خير
الاقيهم بيتكلموا مع الرجالة بمنتهى الأدب والاحترام. حتى لما يختلفوا
معاهم يختلفوا بأسلوب تاني خالص. ولو اتريقوا أو قالوا حاجة ماتصحش, برضه
بيبقى ف حدود.. مفيش نظام الاتهامات والتخبيط والتلكيك وقلة الأدب اللي
بتحصل لما بيكتبوا لواحدة ست.. أو بمعنى أوضح بنت. ما هو أنا لو قولت اني
متجوزة وعندي عيال مثلا, المعاملة هتختلف. لان المدونة اللي قايلة انها
متجوزة بيحترموها حتى لو اختلفوا فعلا معاها, ولو حتى قالت ريان يا فجل
يقولوها "يا سلام. ايه العظمة دي؟" طب ما اللي بيعاكسني ده عمره ما هيعرف
أنا متجوزة ولا لأ.. يبقى ليه الاسلوب بيتغير حسب الحالة الاجتماعية للست
يعني؟

بس ان عرف السبب بطل
العجب.. افتكرت طريقة شيبوب ف المغازلة. خصوصا لما كذا واحد منهم كان مصر
بعد كل الخناق والبهدلة اللي بهدلهالي انه يقابلني!.. نعم؟ بقى انت مطلعني
اسوأ واحدة ف الدنيا, وبعدين عايزنا نتقابل ونبقى صحاب؟ طب مش خايف على
نفسك من الفتنة يا أخي؟ مش خايف من أصحاب السوء اللي زي حالاتي لحسن
يفسدوا اخلاقك؟ عايز تعرفني ليه انشاء الله؟ طب وازاي يعني نبقى صحاب بعد
ما قليت ادبك عليا وغلطت فيا وف عقيدتي وف اخلاقي كمان؟ يعني ما ينفعشي يا
كابتن. لو اللي بيتكلم مجنون ف المستمع عاقل. ولما تلاقيني واحدة محترمة
ومهذبة وصريحة وأقولك عيب ما يصحش وكلامك غلط, المفروض تفهم اني واحدة بنت
بلد وحرة ومش على راسي بطحة. يعني بالذوق كدة يا تحسن اسلوبك ف الكلام يا
انت ف حالك وانا حالي وتفارقني من سكات. لكن الالحاح الرهيب انك تيجي برضه
وتقل ادبك.. سوري يعني, دي مش شهامة ولا رجولة ولا ممكن الاسلوب دا هيوصلك
لحاجة يا ابو الكباتن

النظام
التصادمي بتاع شيبوب دا ممكن كان ينفع من ألف سنة ف الصحرا, لما كانت
القبايل بتهجم على بعض ويروحوا خاطفين ستات القبيلة بالعافية. لكن دلوقتي
ما ينفعش نظام تدبحلي القطة فاخاف واكش واحس برجولتك. لأ دلوقتي الموضوع
مش بالعضلات ولا طول اللسان, الموضوع بالعقل. والبنت زيها زيك. انسانة. ما
ينفعشي تيجي تقتحم بيتها وتشيلها على كتفك وتجري. وما ينفعش تستعرض عضلاتك
عليها عشان ترهبها. السيناريو القديم اللي في دماغك بتاع "دي طلعت ولا
نزلت اخرها بنت", يا ريت تشيله من دماغك خالص وترميه على باب المدونة وانت
داخل. انا بنت صحيح بس بمليون راجل بعون الله. وما اسمحش حد يغلط فيا ولا
يقل ادبه عليا ولا يتبلي عليا بالكدب. هي مش سبهللة

وبدل ما اقلعلك
عين وانت تقلعلي عين, ما نعيش مفتحين احنا الاتنين يا عم! هو لازم التصادم
الدموي دا؟ ما الكلمة الطيبة صدقة وعربون محبة برضه. يعني ما نتفاهم احسن
ونحترم بعض. ازاي اتنين خزأوا عنين بعض هيعرفوا يتفاهموا يعني؟ واحد قلعلي
عيني, هاستفيد ايه انا لما اقلعله عينه ولا عينيه الاتنين حتى؟ سيبك من
حكاية اننا نتعايش مع بعض خالص.. لأ برضه مش خالصين, لان البادي أظلم.
ولاني عمري ما هابتدي واروح لحد اقلع عينه, ف كدة مش عدل. لازم شوية
كياسة.. شوية حساسة.. شوية مفهومية. خصوصا انها مش هترسي على اننا نعيش
عور احنا الاتنين. لأ, هتاخد شلوت يطيرك فوق برج القاهرة. وانت عارف بقى
اللي فوق برج القاهرة. يعني انت اللي مش هتنفع بعدها

الله يرحمك يا
شيبوب, بوظت دماغ الرجالة. ما كنت اتعلم من اخوك عنتر. بلاش يا عم تبقى
شجاع وقوي زيه, كنت اتعلم من شعره وجمال الفاظه. الله يسامحك يا عم.. فضلت
انت بعنيك الاتنين وشغلتلنا مكن تقوير عينين. قال نعيش عور احنا الاتنين!
لأ يا عم.. يفتح الله